大上大落，有利樓市

上星期小弟發表完看淡文章後，大市就掉頭回落，三天光境又返去 20236 這些位。不過小弟並沒有因睇中市而開心，相反有點失落。原因是小弟上星期所套現的股票，價位並沒有大跌；二來我亦冇沽到期指，完全走寶！正所謂「執輸行頭慘過敗家」，賺不到錢我都認為是輸了。

跌到現在這個位置，大市的走勢更趨吊詭。期指明天結算，美國聯儲局連續兩日議息，在此等不明朗因素下，短期後市難測。

金魚缸大上大落，非常難玩，但同時，我終於領悟到樓市唔識升的原因！正常來說，股票市場暢旺，散戶賺到錢，應該會惠及樓市，造成股樓齊升的繁榮現象。但去年地產市道只旺豪宅，中下價樓的市場仍然不景，為甚麼呢？

小弟斷估，原因同樣與「股票」有關！股票市場轉身夠快，肯唔理價的話，要買就買，要沽就沽；那邊，樓市轉手則麻煩得多，手續費雜費一籮籮，還涉及大批文件。快錢人人都想賺，既然股票的快錢易賺，炒家都把資金調去魚缸，樓市又點升得起。

今年，情況似乎有變了。07年只過了數週，波動就如此巨大，可想而知今年的市況會極度反覆。在咁樣的情況下，應該把不少尋求穩定回報的投資者嚇怕，從而把資金調到實物資產上，樓市就成為了很好的選擇。