五月悶局

本預期五月份這個股市傳統淡季，大市會有一番波動，誰不知有波幅冇升幅，恆指只在 20200 - 21000 點上落，悶局一場。現在離恆指結算只剩 2 日，明天又有賣地，股市例跌，究竟大戶有冇留番一手，臨尾送個「驚喜」俾大家？

儘管城中富豪，再加埋「格老」出口術，亦降不了中國股市的溫。大陸股市越升越有，完全冇停的跡象。現在，海外投資者天天擔心大陸股市爆煲，紛紛按兵不動，使到一眾藍籌大股唔上唔落。

大藍籌冇運行，炒家冇野好做，散戶又唔敢高追，唯有轉換戰場，轉炒二三線的細價股。那些「股仔」，平時名不經傳，聽都未聽過，兼且長年唔郁，業務又唔知做乜，但動輒都有幾十巴升的升幅！這也未算恐怖，最恐怖的是，現在坊間充斥很多內幕消息，提供者竟然係果 D 平日不炒股的朋友，而他們提供的「林巴」，又真係爆上，金錢就像垂手可得一樣。

傳統智慧，每當升市將盡，二三線的股仔就會禾雀亂飛，尤其是證券行的股份，創新高往往是見頂先兆；技術分析上，目前有點似 1、2 月份時的形態走勢，大市正處於危險的階段。不過，估底摸頂，向來是高難度動作，即使來一個大調整，我深信只是急速上落，跌得快時回升亦快。