估市

過去一週大市，雖然如我所料在數百點內上下波動，但每天的升跌節奏，卻與外圍行相反，令人無法捉摸，唔知佢想點。

三月份股市已完，大家都過左個非常難忘的月份，冀望四月會露出一點曙光，讓大家放鬆一下心情！

病

由於抱病在身，好耐都冇寫 blog 喇。昏昏沉沉了兩週，最後竟憑一場波，出了一身汗後，就好番了！運動真是神奇，希望唔係迴光返照啦。

向世界出發--汶萊

《向世界出發》係 TVB 近年的佳作，叫好叫座。佢與一般旅遊特輯不同，破格地不以介紹名勝和吃喝玩樂為重點，而是讓帶隊的藝人明星，去一些特別地方，做一些難得的事情，從而反思其人生。

節目好精彩，今輯由曾志偉帶隊的汶萊之行，相信令不少人睇到又羨又妒。小弟就係其中一位！睇完後，先發現依個世界，真係有人間天堂。

汶萊，前稱蘇丹，位於全世界第三大島－婆羅州的西北部，介於馬來西亞東部的砂勞越、沙巴之間，仍是實行君主制度的國家，人民篤信回教。境內 3/4 土地為雨林覆蓋，面向南中國海，自然景觀優美。全年均溫22至31度，沒有颱風。

話汶萊係福地，依句話一D都冇錯，一個國家天災少已經算是福地了，仲要有埋石油，你話福唔福？在 1929 年，有一間英國石油開採公司，在汶萊對出的南中國海領域發現石油。如是者，這個原本是靠種田、捉魚為生的小國，搖身一變成為全東南亞最富庶的國家。而一直統治此地的汶萊皇族，亦都立即發達。現時，輸出石油已經成為該國主要的收入來源。好彩，國王唔係只懂花錢的二世祖，識得利用錢滾錢，在海外不斷投資，令汶萊的經濟年年都有雙位數字增長。

國家暴富，國王有大把錢駛，生活自然極度奢華。皇宮金璧輝煌，宴會排場浮誇，都是意料中事。最吸引我的，係國民的褔利，好到你唔信！

首先國民唔駛交稅，正掛。未算，汶萊公民結婚後可申請公屋，一間千呎獨立洋房的屋！申請者自己起又得，政府幫你起又得，價錢只需幾十萬港幣，月供2、3 千，供夠 10 年就係你喇。

子女方面，學費全免，修畢高中，會補送去外國大學，兼每月送你5千蚊作生活費。冇兒冇女又點呀？唔驚，你病左就去睇醫生啦，唔駛錢；住院做手術，唔駛錢；本地醫唔好，免費送你去外國醫，仲會包埋隨行的親屬住宿。

講左咁耐，係咪好羨慕呢。算吧啦，鬼叫香港冇石油咩，石油股就有！所以我睇完，都拿拿臨走去買番手中石油 (857) 傍下身先。

補裂口

短短四天，恆指就回到 19690 了，國企就重上 9400 點。這四天，日本和美國都先後宣布息口維持不變，再加上多隻藍籌派成績表，大市踏步上去，回升 1000 點。當中，以大陸地產股升得特別厲害，價位比三月頭大跌前還要高！

好喇，依家又來到「古惑星期五」，成績表又派完，後市會點呢？

小弟估計，結算前只會係 19600 至 20000 上上落落。

緊記，今個月期指係淡倉，大戶由咁高沽落去，冇可能俾好友走甩，結算應該會係 19600 附近完成或(一定)會結係 20000 樓下，好友唔好抱太大期望會再升得好高。同樣， 19200 點下開倉的淡友，也是打靶居多，唔駛旨意走得甩。

挾爆淡倉

本預期大陸加息會令港股有一番跌勢，還打算趁機吸納心儀的股票。誰知最早開市的日本，低開走高，表現唔錯。國內股市同樣先跌後回升，令到港股沽壓全消，恆指開市已升穿 19000點，只剩下期指仍低於上週收市價。但這一切，足已令淡友大呼無癮，好友大聲感謝神恩了。

11點前，大市仍受制於加息的消息，普遍股票股價只能靠穩。11 點過後，期指扯起，港股升幅擴大，午後買盤更不斷湧入，最終以接近全日最高水平收市，報19266 點，上升 313點！

始終，現正值多隻藍籌股的公布業績期，大家都預期他們的表現相當亮麗。再加上之前已經跌了咁多，借消息炒作一番亦絕不出奇，大市仍會依靠 941 (星期三出業績）去支撐大市上升。

古惑星期五

星期五的股市，向來很難捕捉，走勢相當吊詭，很多人都稱呼這日做「古惑星期五」。就像昨日(15/3)，港股無啦啦低開，跟住在中午前狂挾淡倉，倒升過百點，高低位相差 400 點！好喇，當大家以為股市見底，係咁搶貨的時候。那邊廂日本肚瀉，港男只好跟隨，下午裂口低開，那些過 lunch 的好倉立時打靶！但最後收十字星當無事發生過。

週五的波幅鉅大，事情並不難理解，統統都是期指的平倉盤在作怪。平日，持倉過夜已要冒很大風險，還要渡過週末兩日，更如火中取粟一樣。天知道兩日期間會發生咩事？企錯邊一個裂口就打沉你了。所以，大部份人都會在週五平倉計數，龐大的波幅就此形成。

就以今週為例，筆者執筆之時，阿爺又再加息，福禍難料。你話如果持了倉過夜，係咪有得震冇得訓？

賣地魔咒

賣地日例跌的魔咒繼續發揮威力，但更重要的，是美股次級債券市場終於有爆煲之事出現，美股急跌，拖累全球出現崩塌現象。

星期三港股在 18700 開出，低開 530 點，跟住全日牛皮至尾，收報 18836.93 點，挫 496.21 點，全日成交金額516.4億，即月期指低水 146 點。好明顯，18600 成為了支持位，昨天第二次試仍然守得住。

星期四，美股在晚上來過漂亮 Deep V，先跌過百再倒升，單日轉向令形勢轉好。早上港股立即跟隨高開，可惜無力再上，成交又偏小。

綜觀這幾天，港股突破唔到 100天平均線 (19490)，但守住 150天平均線 (18799)，後市預期在這五六百點內上落市格局，我的心態亦開始轉為審慎樂觀，是入貨的時候了。

至於，點解我會用 150 天平均線？唔係只有 100 同 250 天平均線嗎？哈哈，係「曾淵滄 」教的。有感 250 日線距敵太遠，其指標略嫌太慢，等跌到落去就太遲了。但 100 日線，又未能反映後市情況，近幾年數次跌破 100 日線，但隨後仍能止跌回穩，並沒有進一步下試 250 日線，所以，就用了中位數的 150 日線，反而得到不俗的預警作用。

是龍是虫，還看明天

經過一輪的大跌市後，股市似趨穩定，拾回些少失地。大苯象匯豐(005)業績比預期稍好，終於止跌回升。工商(1398) 同 中人壽(2628)因為預期換入恒指成份股受追捧。日元回軟，似乎令Carry Trade 拆倉活動稍息，外圍持續反彈，形勢利好。

但筆者認為，大市亦未渡過危險期。通常一段裂口，無論升又好跌又好，都會先補一補裂口，才繼續再去。現在企係19400 點，上面是裂口位，港股必需企穩並大成交一舉上破，才可確定見底，否則仍是趁反彈減貨為主。 加上日元高企後，不排除會引來第二波的平倉潮，總之大家要小心為上啦。

明天政府有地被勾出拍賣，巧合地，近來每逢政府賣地，股市便會回軟，後市能否進一步突破，還看明天。

死狗彈

大市不斷下潛，累積跌幅超過 2000 點，技術上超賣到不得了，期待已久的反彈，姍姍來遲。但遲到好過冇到，大市終於上番 19000 點了，只可惜反彈者，其意義就係彈完會再落，俗稱「死狗彈」！

港股自 03 年沙士後止跌回升，展開大型牛市，不過每年也會出現一次較大型的調整，所需的時間，大約要一至兩個多月。依據過往實例推測，今次跌市，不可能短短一週就完結，理論上要待到月尾或四月頭，才能見底。

今次反彈，先看 19350-400 點，補回第二個裂口，至於 2 萬點那個裂口，應該好難補得晒。

跌穿萬九點！

港股再次插水，收市更加出現一個「怪」現象 ─ ─ 恆指中了老虎機 Jackpot，跌左 777 點，期指則遇上「恐佈襲擊」，跌 911 點。

以不足一週的時間，股市就足足挫了 2000 點，直達 18664，想找個像樣的反彈都冇，後市真係弱過弱煲。

Cash is the King

升市又好，跌市也好，手持一定銀碼的現金，是必需的。這會讓你在投資的調動上，輕鬆得多。升市時雞犬皆升，有錢就可以買多幾隻股票，增加機會；跌市時，現金就更加有用了，持有蟹貨者可以溝淡，冇貨係手就更加好，可以平價掃貨。